ව්‍යාපාරයක් ආරම්භ කරමු 11: රේණුගේ කතාව 1 කොටස සහ භාණ්ඩ මිල තීරණය කිරීම


ව්‍යාපාරයක් ආරම්භ කරමු පාඨමාලාවේ 11 කොටස: How to decide the price of a product or a service?

 

⇦ "ව්‍යාපාරයක් ආරම්භ කරමු" පාඨමාලාවේ සියලුම කොටස්. 

 

⇦ ව්‍යාපාරයක් ආරම්භ කරමු 10: හොඳ ව්‍යාපාරික සැලසුමක් හෝ අදහසක් තියනවා. නමුත් මුදල් බාධාවක් ද? 

⇨ ව්‍යාපාරයක් ආරම්භ කරමු 12: රේණුගේ කතාව 2 කොටස, ණය, අය වැය ඥානය සහ මුදල් පරිපාලනය

 

ආයුබෝවන්, 

අපි අද රේණුගේ Online Shop එකේ කතාව සාකච්චා කරන්න යන්නේ. 

නමුත් ඉස්සෙල්ලම ඔබ මේ ලිපි පෙළ කියවල නැත්නම් මෙතැනින් මුල ඉඳන් කියවන්න පටන් ගන්න. අපි කියල දෙන්න උත්සාහ කරන්නේ කුඩාවට ව්‍යාපාරයක් ආරම්භ කරලා දියුණු වෙන්න අවශ්‍ය කරන දක්ෂතා පද්ධතිය ගැන. 

ඇතැම් අය කල්පනා කරනවා ‘අපිට ව්‍යාපාරයක් කරන්න බැරි සල්ලි නැති නිසා, ආයෝජන නැති නිසා’ කියලා. නමුත් මොහොතකට හිතන්න ඔබගේ වයස අවුරුදු 30ක් නම්, ව්‍යාපාරයකට ආයෝජනය කරන්න ඔබේ අතේ රු. ලක්ෂ දෙකක් තුනක් නැත්නම් ඔබේ සැබෑ ප්‍රශ්නය සල්ලිද නැත්නම් මෙච්චර කාලයක් සල්ලි ටිකක් එකතු කර ගන්න අවශ්‍ය දක්ෂතා පද්ධතිය සහ දැනුමද? 

ඒ දක්ෂතා පද්ධතිය දියුණු අය අවුරුදු 30 වෙනකොට අවශ්‍ය ධනය උපාය ගන්නවා. ඒක තමයි තිත්ත ඇත්ත. 

සරලව කියනවා නම්, සල්ලි නැත්තේ දක්ෂතා පද්ධතියේම සහ ව්‍යාපාරික දනුමේම ප්‍රශ්නයක් නිසා. නමුත් දුක් වෙන්න එපා. අපි මේ කරන්නේ ඒ ගැටලුව විසඳන එක. 

ලෝක ප්‍රසිද්ධ Mc donalds ව්‍යාපාරයේ හිමිකරු ඒ ව්‍යාපාරය ආරම්භ කරන්නේ අවුරුදු පනස් ගණන් වලදී. ඉතින් වයස ප්‍රශ්නයක් නෙවේ, වයස කීය වුනත් අපි දැන් පටන් ගමු. 

නමුත් අපි උත්සාහ කරන්නේ රටම හෝ ලෝකෙම අල්ලන්න නෙවේ. රටට බරක් නැති රැකියා අවස්ථා කිහිපයක් නිර්මාණය කරන, තමන්ගේ දු දරුවෝ එක්ක සතුටින් කාලය ගත කරන, සතිපතා පන්සල් යන, අවම වශයෙන් පංච සීලය රකින, ලද දෙයින් සතුටු වන නමුත් ඉලක්ක සහිතව වැඩ කරන, ධාර්මික කුඩා සිංහල ව්‍යාපාරික ප්‍රජාවක් අපේ රටට බිහි කරන්න. 

ඒ අනුව මේ පින්වත් රට සම්බුද්ධ ශාසනය 5,000 කල් පවතින කෙලෙස් අඩු මිනිසුන් ජිවත් වන සැබෑම පින්බිමක් කර ගන්න. ඒ තමයි මගේ සිහිනය. 

එකට දේශපාලනික සහ ආර්ථිකමය මග මෙතැනින් කියවන්න: විමධ්‍යගත ආර්ථික සැලසුම: https://kaalama.org/read-blog/3



අද මාතෘකාව භාණ්ඩයක හෝ සේවයක මිල.

මිල තීරණය කිරීමේදී මුලිකම දේ තමයි නිෂ්පාදන වියදමට ලාභයක් එකතු කිරීම. සේවයක් වුනත් තමන්ගේ කාලය හෝ සේවක වැටුප් සලකල වියදමට ලාභයක් එකතු කිරීම කරන්න පුළුවන්.  

වියදම + ලාභය = මිල 

ඇතැම් ක්‍රම වලදී ප්‍රවාහන වියදමත් භාණ්ඩයේ වියදමට එකතු කරලා මිල තීරණය කරනවා. 

වියදම + ප්‍රවාහන ගාස්තු + ලාභය = මිල 

නමුත් ඇතැම් අවස්ථාවල අපි ප්‍රවාහන වියදම් සියල්ල අපේ ව්‍යාපාරයේ මාසික වියදමක් විදිහට සලකනවා. එක තමන්ගේ ව්‍යාපාරය අනුව තමයි තීරණය කරන්න වෙන්නේ. 

මේ ටික කවුරුත් දන්න නිසා වැඩිය කතා කරන්න දෙයක් නැහැ. 

 

නමුත් වැදගත්ම දේ තමයි ඒ කිව්ව ලාභය තීරණය කිරීම. සාමාන්‍යයෙන් ප්‍රතිශතයක් විදිහට සිල්ලර වෙළඳාමේ දී මේ අගය 3% - 50% දක්වා හෝ වැඩියෙන් භාණ්ඩය අනුව තීරණය වෙන්න පුළුවන්. ඒ තීරණය ගන්න වෙන්නේ හැමතිස්සෙම වෙළඳපොලේ මිල කීයද කියල බලල. 

 

අපි රේණුගේ ව්‍යාපාරය උදාහරණයකට ගමු. 

රේණුගේ ව්‍යාපාරය තමයි බෝතල් කල අච්චාරු කාලාම Online Shop එකක් හරහා සිල්ලර විකිණීම. ඇය තමන්ගේ අවට ප්‍රදේශය නැත්නම් කාලාම ජාලය තුල රු.150/- ක සේවා ගාස්තුවකට ඇනවුම් නිවසටම ගෙනත් දෙනවා.  

ඒ හැම රු.150 කින්ම ඇයට රු. 30ක ලාභයක් තියනවා. ඉතිරි ටික යන්නේ ප්‍රවාහනය කරන මල්ලිට. 

බොහොම මහන්සියෙන් ඇය ෆෝන් එකෙන් කතා කරලා කතා කරලා නිවාස දෙසීයක ස්ථිර customer base එකක් මේ වෙනකොට හදාගෙන ඉවරයි. 

ඒ නිවාස දෙසීයෙන් සහ පිටින් ඇයට මාසෙකට ඇනවුම් 400ක් ලැබෙනවා. එක ඇනවුමක සාමාන්‍ය වටිනාකම රු. 900ක් සහ රේණුට 20% ලාභයක් තියනවා. 

රේණුගේ මාසෙක දල ලාභය = 400 * 900 * 20 / 100 = 72,000/-

ප්‍රවාහනයෙන් අමතර අදායම = 400 * 30 = 12,000/- 

ඇගේ සම්පුර්ණ මාසික දළ ලාභය = 84,000/-  

ප්‍රවාහනය කරන මල්ලිටත් රේණු නිසා මාසෙකට රු 48,000 ක අදායමක් ලැබෙනවා. Bike එකේ වියදම් සහ හැමදාම හවස පහෙන් පස්සේ පැයක් දෙකක් දුවන්න තියනවා. එච්චරයි. 

ගෙදර ඉඳලම සරලව තනියම කර ගෙන යන නිසා ඇය ඉතාම සතුටින් වැඩේ කරගෙන යනවා.

රේණු මිල ස්ථාවරව තීරණය කරලා තියන්නේ. එක ඇනවුමක බෝතල් 3 ක් තියෙන්න ඕනැ සහ ඇයට 20% ක ලාභයක් තියෙන්න ඕනැ. ඒ මිල ඇය වෙනස් කරන්නේ නැහැ. තොග ඇනවුමක් අවොත් විතරක් ටිකක් අඩු කරලා දෙනවා. ඒ විදිහට තමයි අගේ ව්‍යාපාරය යන්නේ. 

 

දවසක් ඇගේ මිතුරියක් එනවා කාලෙකට පස්සේ. ඇගේ නම මාධවී. මාධවී හොඳ පළපුරුදු සිංහල ව්‍යාපාරික කාන්තාවක්. රේණුගේ මේ ව්‍යාපාරය දැකල ඇය ඉතාම සතුටු වෙනවා (අපේ සිංහල කාන්තාවෝ එහෙම ඉරිසියා කරන්නේ නැහැ. ඒ ඉස්සර).

ඊට පස්සේ මෙහෙම කතා බහක් යනවා. 

 

මාධවී: රේණු ඔයාට අඩු කරලා දෙන්න කියල කෝල් එන්නේ නැත්ද? 

රේණු: මොකද නැත්තේ බං, දවසට කෝල් තුන හතරක් එනවා. මම දෙන්නේ නැහැ. අපි මහන්සි වෙන තරම දන්නේ අපිනේ. දැනටත් wholesale price එකට දෙන්නේ. 

මාධවී: ඒ කියන්නේ මාසෙකට කෝල්ස් 100ක් විතර. උඹ මේවා හදන්නේ කොහොමද? කාට හරි කියල හදවනවද? 

රේණු: නැහැ බං එහෙම කලොත් මේ මිලට දෙන්න බැහැ. මම සතියට පාරක් හදල බෝතල් කරනවා. 

 

මාධවී තවත් ප්‍රශ්න අහල ව්‍යාපාරය තේරුම් අරගෙන ෆෝන් එක අරන් ගණන් වගයක් හදල මෙහෙම කියනවා.  

රේණු ඔයා මෙහෙම කරන්න. ඊළඟ සතියේ ඉඳල හැම order එකකටම රු.50ක් මිල වැඩි කරන්න. දැනටත් ඔයා තොග මිලට දෙන නිසා කාටවත් ඊටවඩා හොඳ මිලක් market එකේ හොයන්න වෙන්නේ නැහැ. ඔයා තමන්ම ගෙදර ඉඳලම නිෂ්පාදනය කරලා විකුණන නිසා අනිත් අයට උඹත් එක්ක තරඟ කරන්න ලේසි නැහැ.

මේ කරන දේ නිසා ඔයාට ඇනවුම් 80 ක් විතර අඩු වෙයි. නමුත් කමක් නැහැ ඉතිරි 320න් අමතර රු 50 ගානේ ඔයාට එනවා. එනිසා ඔයාගේ income එක කලින් වගේමයි අඩු වෙන්නේ නැහැ. 

ඒ වගේම ඇනවුම් 80ක බඩු දැන්  ඔයාගේ අතේ ඉතිරි වෙනවා. ඒවා 20% ලාබෙ වෙනුවට තව 10% ක් මිල අඩු කරලා අර අඩුවෙන් ඉල්ලන අයට දෙන්න. 

නමුත් කියන්න හැමදාම දෙන්න බැහැ, පළමු ඇනවුම නිසා අඩුකරලා දෙන්නම් කියන්න. මගේ නිෂ්පාදන හොඳ නිසා නැවත එන බව විශ්වාසයි,..... ඔය විදිහට හොඳින් ලස්සනට කතා කරන්න. 

එතකොට ඒ ඇනවුම් නිසා ප්‍රවාහන අදායම අඩු වෙන්නෙත් නැහැ. තව අමතරව 7200 ක විතර ලාභයකුත් එනවා. කොහොමද වැඩේ?

ඒ ඔක්කොටොම වඩා ඒ උපක්‍රමයෙන් මාස කීපයකින් 320 ට අඩු වුන ඇනවුම් ගණන නැවත 400 කර ගන්න පුළුවන්. එතකොට උඹේ ලාභය 84,000 ඉඳල 104,000 දක්වා ඉහල යනවා. නිෂ්පාදනයේ වෙනසක් නැතුවම. 

මේ උපක්‍රමය උඹ දිගටම කලොත් ඇනවුම් 400, 1000 කරන්න වැඩි කාලයක් යන්නේ නැහැ. 

 

මේ උපමා කතාවේ අපිට ඉගෙන ගන්න ලොකු පාඩමක් තියනවා. ඒ තමයි මිල තීරණය කිරීමේ උපක්‍රමය.
මේ උපක්‍රමය අනුව හැම තිස්සෙම අලුත් customer කෙනෙක් හිස් අතින් යවන්නේ නැහැ. Cost එකට හරි දීල පාරිභෝගිකයා නැවත ගෙන්න ගන්න උත්සාහ කරනවා.

දැන් ඔබට මොලේ කලඳක් හරි තියනවා නම් මතක් වෙන්න ඕනැ කවුද මේ වැඩේ වෙළඳපොලේ දක්ෂ විදිහට කරන්නේ කියල.

 

ඒ උපක්‍රමයේ වාසි කීපයක් තියනවා. 

පාරිභෝගිකයන් සතුටු වීම:

නෑ, බෑ වචන අහන්න අපි කවුරුත් කැමති නැහැ. නමුත් “ඔබතුමාට මම අඩු කරලා දෙන්නම්” වගේ අපිට වටිනා කමක් ලැබෙන වචන අහන්න අපි කැමතියි. ඒ වගේම මුලින්ම ගන්න නොදන්න දේ අඩුවට ගන්න තමයි අපි කැමති.  භාණ්ඩය හොඳ නම් නියම මිලට උනත් නැවත ගන්නවා. 

 

නැවත ගෙන්වා ගන්න තියන අවස්ථාව 500% කින් විතර වැඩි කර ගැනීම:

Customer කෙනෙක් හිස් අතින් යැව්වොත් අයිත් එන්න තියන අවස්ථාව හරිම අඩුයි. නමුත් සතුටු සිතින් විකිණීමක් කරලා යැව්වොත් නැවත එන්න තියන අවස්ථාව ඉතාම ඉහල යනවා. මොකද ඔහු හෝ ඇය දැන් අපේ customer කෙනෙක් නිසා. නිකම්ම නිකම් කෙනෙක් නෙවේ අපි එක්ක ගනු දෙනු කල කෙනෙක්. එකේ ලොකු වෙනසක් තියනවා. 

 

අපේ තොග ඉක්මනින් මුදල් වීම:

රු.1000ක් වටිනා භාණ්ඩයක් මාසයක් තියාගෙන ඉඳල 20% ලාභයට විකුණුවොත්, අපේ මුදල සහ භාණ්ඩය මාසයක්ම හිර වෙලා තියනවා. මාසෙක ප්‍රතිලාභය (Return of Investment, ROI) 20% ක් වෙනවා. හොඳයි, නරක නැහැ. නමුත් හොඳ හොඳටම මදි. එකයි ප්‍රශ්නේ. 

ඒ භාණ්ඩයම අපි පහුව දා, 3% ලාභයට විකුණුවොත් මොකද වෙන්නේ? දැන් 17%ක් මට නැතිවුණා කියල මැරෙන්න හදන්න එපා. 

අපිට නැවත ආයෝජනය කරන්න, නැවත විකුණන්න අවස්ථාව ලැබෙනවා. භාණ්ඩය හිර නොවී ඉක්මනින් මුදල් වන හින්ද අවදානම ඉතාම අඩු වෙනවා. ඇඳිරිනීතිය දැම්මත් ලොකු ගැටළුවක් නැහැ. මොකද අතේ නිතර ගැවසෙන්නේ මුදල්, භාණ්ඩ නොවේ. 

ඒ වගේම මාසික ROI එක දැන් කීයද? 3% *30 = 90%ක්. මේ කරණය හොඳට තේරුම් ගන්න. අපිට වඩා වටින්නේ ස්ථාවර ලාභ ප්‍රතිශතය නෙවේ, ROI එකත් මුදල් වශයෙන් මුදල් අතේ ගැවසීමත්. මේක ලියල තියාගෙන අනුගමනය කරන්න.

ඔබ ව්‍යාපාරිකයෙක් නම්, අදම පරණ බඩු අඩුවට විකුණලා නැවත පටන් ගන්න. 

  

අද පාඩම ඒ ඇති කියල හිතනවා. මේ දේවල් නැවත නැවත කියවල හොඳින් තේරුම් අරන් ක්‍රියාත්මක කරන්න. අපිට ඕනැ දක්ෂ සිංහල ව්‍යාපාරිකයෝ මේ රටේ රජ කරනවා බලන්න. 

ඒ වගේම මේ ලිපි පෙළම නැවත නැවත කියවන්න, කාලාම Online Shop එකක් ඉක්මනින් පටන් ගමු.

මේ ගැන යම් ගැටළු තියනවා නම් කමෙන්ට් කරන්න.

තෙරුවන් සරණයි!

ආචාර්ය බුද්ධික අදිකාරී, සේනා සංවිධානය, කාලාමය.
සිංහල ව්‍යවසායකයන් බිහි කිරීමේ ව්‍යාපෘතිය : https://kaalama.org/read-blog/204

 

⇦ ව්‍යාපාරයක් ආරම්භ කරමු 10: හොඳ ව්‍යාපාරික සැලසුමක් හෝ අදහසක් තියනවා. නමුත් මුදල් බාධාවක් ද?  

⇨ ව්‍යාපාරයක් ආරම්භ කරමු 12: රේණුගේ කතාව 2 කොටස, ණය, අය වැය ඥානය සහ මුදල් පරිපාලනය


----//-----
by Dr. Buddika Adikari
B.Sc (Moratuwa), PhD (Surrey, UK)
© Buddika R B Adikari All Rights Reserved.
#Dr_Adikari 

 

Android APP එක මෙතැනින් බාගත කරන්න

 මේ යතුරෙන් විනාඩියෙන් 

⇨ කාලාමයට ඇතුල් වන්න. 

කාලාම FAQs 

 කාලාමයේ ලියාපදිංචි වෙන්නේ කොහොමද?

 කාලාමය යනු කුමක්ද?

 විශේෂ එක්දින ව්‍යාපාරික පුහුණු වැඩමුළුවට සම්බන්ධ වෙන්නේ කොහොමද?

 නොමිළේ ලබා දෙන "ව්‍යාපාරයක් ආරම්භ කරමු" පාඨමාලාව කොහෙද තියන්නේ?

 කාලාම Android APP එක බාගත කරන්නේ කොහොමද?

 විමධ්‍යගත ආර්ථික සැලැස්ම කියන්නේ මොකක්ද?

 

මම ව්‍යාපාරිකයෙක්, 

 මම Online Shop එකක් හදන්නේ කොහොමද?

 මම මගේම Customer Base එකක් හදන්නේ කොහොමද?

 මගේ දැන්වීම් කාලාම Market එකට එකතු කරන්නේ කොහොමද?

 මට කාලාමයේ තියන විශේෂ ව්‍යාපාරික අවස්ථා මොනවද? (ව්‍යාපාරික අවස්ථා 25ක්)

 මට ස්ථාවර Customer Base එකක් සකස් කිරීම ගැන විශේෂ පුහුණුක් ලබා ගත හැකිද?

 Quick Login Here